Una Pi Simana di Donnantoni

Era na fimmina di ferru però avia un cori di petra

Nta terra da chiesa separata,muriu a Signura Taccer,chi avia assai chi era nto nfunnu i lettu e a testa non ci riggia cchiù.Appena a
Vuci si spaggiu ci forru chiddi chi si dispiacerru,ma tanti sunarru i trummetti
Pi festeggiari picchì quannu fu Primu Ministru ci fici fari i budedda fradici.Idda
E so cumpari Reggani ni ficiru i tutti i culuri;si misiru nta testa chi
ci aviunu dari tutti cosi e ricchi,chi si pagaunu cchiù picca tassi e non aviunu
I sindacati nto menzu e scatuli,avissunu ammanteniri ricchizza e travagghiu pi tutti.A Nglisa
Annava dicennu peti peti ca società non esistia,chi non c’era bisognu di fari tanti
Liggi pi cchiù poviri,chi ognunu si l'avia a vidiri pi caddi soi.I minaturi,chi sunnu
Genti chi non si scanta, ficiru sciopiru, però idda avia u cuteddu da
Patti di manicu,i battiu e ci fici peddiri u travagghiu.Canuscennuli,è sicuru chi
Quannu a ncontrunu suttaterra ci fannu na facci nira comu u cabbuni.
Quann'era o guvennu a Bossa di Lontra nchianoi assai,sulu chi
I povarazzi chi non aviunu travagghiu o si mbriacaunu o puru si nannaunu a ru
Bari.A Signura nte cirimonii si smastriava comu si era na rigina,ma i cosi annau
Nu mali e a so stidda leggiu leggiu si stava stutannu.Era lesta chi finia,quannu
Quattru generali aggentini,fascisti chi mani nsanguliati,circarru di invadiri
L’isuli Malvini, chi erunu terri di nglisi a fini dill’oceunu Atlanticu. Margarita non
Su fici diri du voti,uscioi u pettu e iammoi subutu guerra.Nta quattru e quattrottu
I fici girari ca cuda nto menzu e iammi e ci batteru tutti i mani.Paria tuttu a postu, ma siccomu annava o stottu comu i capri,ci mintiu na tassa a
Stissa pi tutti,ricchi e poviri,e finammenti cadiu du sceccu. A Taccer si potti
Fari a nomina di Signura di Ferru, ma nuddu si po’ scuddari chi fici moriri di
Fami Bobby Sandis nte cacciri irlandisi ,chi dissi chi Mandela era un dilinquenti
E Pinochet un bravu cristianu.A Lontra cuminciaru a scumittiri si nnava nto
Paradisu o nto nfernu,ma appiru suspenniri i puntati tantu è sicuru unni va a
Finiri.