Una pi simana di Donnantoni

Un Papa di l’autru munnu

Dopu tantu spittari a finetsra si apriu e nto baccuni si faccioi u
Cchiù vecchiu di caddinali chi ghicchiannu e dissi urbi e orbi.
U novu Papa è Mariu Bergoglio però si fa chiamari Francesco.
A chiazza pu un secunnu ristoi muta picchi no canuscia, poi
Si ripigghoi,battiu i manu fotti fotti e bucioi “Eviva u papa!”.

I caddinali nte du ionna chi ristaru chiusi nta Cappella Sistina ficiru nu bellu
Travagghiu e vutaru pi cuscienza e no pi cunvinenza,pinsaru ca
Chiesa non è sulu nta l’Italia o nta Spagna o nta Francia ,ma è nta
Tuttu u munnu e chi era l'ura di canciari. Mariu Bettogliu veni di
L’Aggentina,di l’America povira , figghiu
Di un ferruveri du nord,dopu u diploma si fici parrinu e ntrasiu nte Gesuiti chi
Sunnu i megghi pi studi e nsignamenti. U ficiru vescuvu e puru caddinali nta
Bonosairis. Sibbiu u populu e iutoi i povarazzi di barracchi.

Ma c’era nu bruttu ricoddu chi ci macinava 
Nta testa e un ghionnu si dicidiu e dissi na missa di pinitenza pi piccati
Da dittatura fascista,quannu a so Aggentina avia divintatu un cacciri
E i motti cadiunu du celu. I so primi paroli, a so prisenza mudesta,u
So inchinu vessu a genti chi prigava pi iddu,ficiru luci nta San Petru
E nta tutta Roma e si pigghioi un nomi tantu bellu chi fa rizzicari u
Pilu; chiddu di Francescu, u santu d’Assisi,chi ni fa pinsari a na chiesa
povira povira e pi poviri. Pari na strada signata chidda chi voli fari u novu Papa.
N’avriumu bisognu tutti, cattolici, di autri riligioni e magara chiddi
Chi non cridunu a nenti.