Una pi simana di Donnantoni

A Cruci, u matteddu e a fauci  

A Lanterna si stutoi e Don Gallu annoi a truvari  Fabriziu pi cantari i so

canzuni cu coru di l’anciuli du Paradisu.

Quannu era figghiuleddu fici u pattiggianu,comu tanti autri taliani,

pi libbirari u so paisi du mobbu fascista e ristoi pi tutta a so vita 

un suddatu da giustizia.

Un ghionnu 'ncuntroi un preti salesianu chi ci apriu l'occhi. 

U Vangelu di Gesù era a strada pi ciccari chiddu chi vulia ,

e a religioni divintoi u so manciari. U so viaggiu fu na strada ritta

vessu a giustizia pi menzu dell’amuri pi l’umanità. Dimustroi chi paroli 

e chi fatti comu si fa. Nte cacciri minorili,nte barracchi brasiliani,nte

carruggi genovisi, a iutari tutti chiddi chi aviunu cchiù bisognu.

Quannu parrava di buttani, di caccirati, di ricchiuni, chi passunu pi uttimi,

a 'Ntria ci brillaunu l’occhi, picchi avia vistu chi erunu brutti,comu

si dici,ma aviunu tannta biddizza e amuri. Cu chiddu chi ci

cuntava sta genti, Don Gallu si cunvinciu sempri cchiùssai chi i

sofferenzi non viniunu pi casu. U problema era chi i liggi

difennunu i cchiù fotti, chiddi chi soddi.

E allura u parrinu divintoi cumpagnu e si

'ziccoi nte manifestazioni du G8, NO TAV, Fiom, contru a Mafia, i

guerri, i banchi e i meccati zuca sangu. 

Stu fattu a chiddi ca birritta russa

non ci caloi rittu e u misiru i patti comu na pecura

nira.

'Ntria suffria assai a vidiri a so Chiesa chi si scantava di comunisti e

annava a braccettu chi fotti e,cosi di l’autru munnu, puru chi fascisti.

Poi rruvoi Papa Francescu e ci fici nasciri na spiranza.

Cu sapi si a Chiesa si libira di fissazzioni du sessu e pensa pi daveru comu

avi iutari u prossimu? 

E’ sicuru chi Don Gallu saria cuntentu e continuiria

a cantari Bella Ciao.

Una pi simana di Donnantoni

U Colosseu e I Piramidi nta na sula cattulina

A San Giuvanni a Roma e nta chidda di Tahir o Cairu a genti scinniu nta

Ghiazza a protestari,ca l’hannu contru i Cumpagni.

I Cumpagni 'narru pridicannu pi vint’anni chi u “ Fradiciu” era u mali,

chi era 'mrugghiuni e puru dilinquenti e pi fari i cazzi so facia moriri di famia genti, e chi pi putiri campari s’avia mannari 'nte cacciri.

I Fratelli pi quarant’anni aviunu cummattutu a dittatura du “ Farauni”  e cettuni fineru puru nte cacciri,ma dopu chi ficinu a rivoluzzioni assemi o populu cu sangu di martiri,appena 'rruvaru o poteri si misuru d’accoddu chi

suddati. A stissa cosa ficiru i Cumpagni chi ca scaciuni di l’emeggenza,si misuru cu “Fradiciu”. E tutti chiddi chi vutaru,ca pighiarru nta ddu postu.

Nte du ghiazzi ttaccaru fratelli e cumpagni offani di patri,chi continuanu a cummattiri pu travagghiu, pa giustizzia, pa scola, pi spidali e pa libbittà.

U problema è chi tuttu u munnu è paisi. Unni ti trovi trovi, quannu chiddi chi cumannunu pi daveru, chiddi chi hannu i soddi, sentunu fetu di cambiamentu, quannu vidunu cu populu si cumincia a moviri, si mentunu tutti subbutu

D’accoddu e i povarazzi restunu ca cannila nte manu.

U problema è sempri u stissu.

Annamu a vutari, scioperamu, protestamu,scrivemu belli poesii, ma quannu passamu u confini n’avemu a fimmari annunca ni fannu sautari 'nta l’aria.

E pinsari chi putia nasciri na parintela fra Italia e Egittu.

U “Fradiciu” avia dittu chi s’avia fattu zitu ca niputi du “Farauni”.

Sfuttuna ca figghiola era marucchina e si chiamava Rubbi picchì ci spillava i soddi e vicchiareddi .

Una Pi Simana
di Donnantoni

Un immu e tanti piccati ancora è dda chi parra cu San Petru e ci sta cuntannu tuttu chiddu chi cumminoi 'nta sta terra.

U processu du zu Giuliu ci menti assai tempu pi rrivari a sintenza, pi tanti causi unni è 'ntricatu e picchi cà so pallantina e chi so raggiunamenti longa u brodu e misca i catti puru davanti a giustizia divina.

Spinniu a so vita pi cumannari e pi fari l’omu potenti.

'Ntrasia e niscia du vaticanu, parrava chi presidenti, era amicu di bancheri,di principali delinguenti e di politici nni facia chiddu chi vulia.

Chi ricchi a sventula e u immu pisanti di tanti misteri, ci faciunu 'nte giunnali a carricatura ma nuddu rinisciu mi su pigghia pu culu.

'Nto so longu viaggiu scigliu sempri u straduni lagghu da cunvinienza e non u violu strittu da giustizia, chi chiddu era pi babbi o, peggiu ancora, pi comunisti.

E fici mazzari o fraticeddu Moru chi ci scriviu littri chi faciunu strazzari u cori, Picuredda ,

u spiuni tradituri, l’onestu Ambrosoli chi vulia ncastrari u patticianu Sindoni, u Generali

ca so giovini mugghieri. Pinsarru puru a iddu quannu truvaru u Banchieri 'mpinnutu

sutta u ponti i Lontra, e ancora non sapemu si bacioi nto mussu a Totò o ci strincciu

sulu a manu. Ogni matina si iazzava e si nannava a missa, e pi l’occhi sociali facia

opiri di beni. Ma puru pi iddu arrivoi u ionnu du giudiziu.

Cirimonia chi botti

Una Pi Simana 
di Donnantoni


E mentri Lettinu ‘nto Palazzu chi so cumpagni ministri giuroi, fora 'nta ghiazza,u manuali Preiti sparoi e feriu du carabbineri e na fimmina in cinta.U govennu di Enricu u niputi i Gianni nasciu ca mala cutra.
A tutti c’hannoi a testa a comu ci finiu a Moru,quannu fici u compru missu cu Bellinguer e cacchidunu si piscioi in coddu, ma chidda fu tutta n’autra storia, chiddu era un compromisu,chistu è nu brogghiu, tannu erunu i Brigati Russi,ora è un poviru cristu.Preiti,emigratu calabrisi,lassatu da mugghieri e senza travagghiu, si avia cacchi soddu su giucava e a testa ci pattia chi un fallutu si sintia. Iddu pinsava ca cuppa non era a soi,ma di politici chi rubbaunu e non faciunu nenti pa genti.Sti pinseri ci faciunu sempi cchiù sai ‘nchianari a nirbina e tantu ci macinaru ‘nta testa chi si fici veniri a felici idea chi si putia vindicari e putia sparari e criminali. Ma u pianu ci falliu e ci annoi ‘nto menzu cu non ci cuppava.Unni u dutturi.nto barri,a posta,nte matrimoni e nte funerali,non c’è postu unni non si parra mali di politici.Tutti parrunu chi s’avvissiru a mazzari,chi s’avissiru cundannari e travagghi fozzati,chi ci vulissi na bumma quannu sunnu tutti dda a Montecitoriu.Propria chiddu chi pinsava Preiti, purusi sbagghioi bessagliu.Fossi saria ura mi ni dariumu tutti na cammata e mi ni facissimu n’esami di cuscienza.Si ci sunnu tanti politici chi robbunu e non sannu fari nenti, chisti non venunu di Marti,semu nui chi mannamu dda.Quannu annamu a vutari inveci di scegliri chiddu chi ni fici un favuri, chiddu cchiù furbu e fotogenicu,picchì non vutamu u cchiù onestu e capaci? Preiti è coppevuli, ma tutti l’autri non sunnu innocenti. A scusa chi pi ora c’è u pucceddu non è bona, picchì ‘nte regionali, provinciali etc facemu puru peggiu.